Siglir tar il cuntegn

Header

audio
Il Zunfthaus Zur Rebleuten en la citad veglia da Cuira.
RTR, P. Bundi
laschar ir. Durada: 3 minutas 41 Secundas.
cuntegn

Cuira: Hotel Rebleuten è concurs ma vegn manà vinavant

Il fittadin dal hotel e restaurant Zunfthaus Zur Rebleuten a Cuira è concurs. Tuttina vegnan il hotel sco er l'ustaria manà vinavant sco enfin uss. Quai grazia a l'agid dal possessur dal bajetg.

Il Zunfthaus zur Rebleuten è ina chasa da tradiziun amez la citad veglia da Cuira. Dapi il 2008 tutga il bajetg a la Residenza Terminus Scuol SA cun sez a Samedan. Lura ha Karoline Hunziker surprendì la bitgetta. La fin dal 2013 ha ella dentant puspè stuì dar giu ella - il Rebleuten è ì concurs. Curt suenter ha la possessura chattà in nov fittadin, Mario Fluor. Strusch dus onns e mez è er el concurs. Quai n'haja dentant da far nagut cun il Rebleuten, i saja daivets da pli baut, lascha el savair RTR. Dapli na vuless el dentant betg dir. Er il conpossessur da la Residenza Terminus Scuol SA, Richard Hunziker, conferma quai. El conceda dentant ch'i na saja betg simpel da manar ina chasa uschè veglia er perquai che l'ustaria ed er la cuschina sa chattan en l'emprima auzada. Er saja pervi dals custs e pervi dal plaz betg pussaivel dad installar in ascensur.

I va vinavant
Malgrà che Mario Fluor ha annunzià concurs vai vinavant cun il Zunfthaus Zur Rebleuten. El resta vinavant fittadin sto dentant betg pajar fit per il mument, usche Richard Hunziker vers RTR. Tenor l'uffici da concurs Plessur a Cuira ch'è responsabel per il cas è quai pussaivel perquai che Mario Fluor ha annunzià concurs privat. Uschia han ils possessurs dal Rebleuten pudì fundar ina societad da responsabladad limitada per far in tagl cler tranter ils daivets dal fittadin ed il manaschi dal Rebleuten.

Dapli da «Total local»

Scrollar a sanestra Scrollar a dretga