L'emprim success cun rock dir – lura ina ballada che daventa in grond semperverd. Quai è capità a bleras bands, ed er ad ina band americana la fin dals onns 70: «Styx» da Chicago han gì ils emprims hits la mesadad dals onns 70, cun rock da ghitarra ed elements dal rock d'art.
Lur pli grond hit han els gì il 1979 cura ch'els han mess da la vart ils tuns dirs ed han cumenzà a far chanzuns da pop. Quai era in toc da lur novavel disc «Cornerstone», per ina giada ina cumposiziun dal ghitarrist Tommy Shaw. El era adina in pau en concurrenza ed en conflict cun il keyboardist Dennis DeYoung che cumponiva la gronda part dals tocs da «Styx» – ed els dus eran per il solit er ils chantadurs.
La contribuziun da Shaw era ina ballada en stil da folk cun accordeon, mandolinas, ghitarras e bass accustic, insatge dal tuttafatg nov per la band. En ils Stadis Unids ha la chanzun pauc success, però en l'Europa daventa quai lur pli grond hit. «Styx» datti anc adina ed els van er sin turnea, dapi 10 onns però senza Dennis DeYoung.
