L'Engiadinaisa Bettina Vital viva cun sia famiglia ad Uetikon al Lai da Turitg. Là lavura la dunna da 41 onns sco romanista independenta, organisatura d'occurrenzas culturalas, traductura ed intermediatura da cultura en in pensum da radund 50%. Tranter auter organiseschan ella e ses um er la «Operetta sin plazzetta» ad Ardez.
La coordinaziun da lavur e famiglia saja per ella e ses um, che è chantadur professiunal e dirigent, adina puspè ina sfida.
«Noss model da famiglia è bler pli cumpatibel sco independents»
Avant che Bettina Vital ha cumenzà a studegiar a l'Universitad da Turitg «cumparatistica», ha ella fatg ina storta sur il mund da la gastronomia cun cumenzar ina scolaziun sco hoteliera. La cultura, musica e lingua èn finalmain stadas la direcziun ch'ella ha instradà. Oz sa numna Bettina Vital er gugent «Crea-cultura» cun sias lavurs multifaras en differents lieus.
