Durant nov onns han investiders dal Katar bajegià ed investì 550 milliuns francs en in cumplex d'hotel da dimensiuns enormas. Il cumplex sa cumpona da quatter hotels cun varga 360 chombras, 12 restaurants, in center da conferenza sco era ina purschida da wellness.
Lieu da turissem cun lunga tradiziun
Il Bürgenstock che giascha sur il Lai dals Quatter Chantuns cun ina survista da bellezza è gia dapi pli ch'in tschientaner en ils mauns da turists cun bursas grossas. Dapi il 1872 vala il Bürgenstock sco lieu popular per far vacanzas e tegnair congress. Pli tard èsi vegnì bajegià divers hotels da luxus sin quest culm. Ils onns 50 e 60 sentupava prominenza ord la scena da show, film e politica sin il Bürgenstock.
Il Bürgenstock sauda tar il chantun Sutsilvania e betg forsa tar il chantun Lucerna. Be ina pitschna part, quella en il nord, è lucernaisa e vala sco exclava dal chantun Lucerna.