Il 1988 ha Phil Collins in megahit cun la ballada «A groovy kind of love», in toc che cumpara sin il soundtrack da ses film «Buster». La versiun originala è però 20 onns pli veglia, da la band brittanica «Mindbenders». Quella ha cun «A groovy kind of love» in grond success, quai è però ses ultim grond hit e pauc pli tard va sia carriera a fin. La melodia è però bler pli veglia e ses origins èn da tschertgar a Vienna en il 18avel tschientaner.
Muzio Clementi era quella giada in cumponist enconuschent, surtut pervi da ses tocs da clavazin. In da quels ha servì a la cumponista americana Carole Bayer sco inspiraziun per «A groovy kind of love». Ella dovra però be ils emprims tacts e fa midadas fundamentalas ed or dal «Allegro» datti tar ils «Mindbenders» in ritmus pli plaun da ballada che daventa tar Phil Collins anc ina giada pli plaun.
Per el è quai stà in da ses gronds hits e l'unica chanzun ch'è rivada en Gronda Britannia ed en ils Stadis Unids sin plazza 1.