Mintga duas secundas vegnan tschintg novs umans vitiers. Quai che munta bun 80 milliuns ad onn. Tants umans vivan en la Germania. Pia vegn mintg'onn vitiers ina giada la Germania.
Per far attents sin ils problems che sa dattan en connex cun la gronda cifra dad umans sin il mund han las Naziuns Unidas stgaffì l'onn 1989 il di da la populaziun mundiala, mintgamai ils 11 da fanadur.
Sch'il mund fiss in pitschen vitg
In magazin online ha quintà enturn las relaziuns sin il mund per in pitschen vitg da 100 persunas. Quai muntass lura tranter auter il suandant:
- 80 da las 100 persunas n'avessan nagin suttetg
- Passa la mesadad dal vitg tutgass a sis persunas
- ca. 70 persunas fissan analfabets
- passa la mesadad dal vitg n'avess betg avunda da mangiar
- 24 n'avessan nagina electricitad e 24 avessan ina televisiun
- i avess 52 dunnas e 48 umens
