Il duo «Laid Back» dal Danmarc ha gì precis dus hits: il 1990 «Bakerman», ina chanzun zunt curiusa – ed il 1984 «Sunshine Reggae», in grond hit da stad.
Il 1979 han il keyboardist Tim Stahl ed il ghitarrist John Guldberg fundà lur band. En lur patria danaisa èn els bain spert vegnids enconuschents cun lur pop lev e lur texts simpels. Lur emprim hit internaziunal è er ina chanzun da questa categoria, anc cun in pau sulegl tropical ed in ritmus da reggae relaxà. Els han però stuì avair pazienza, pertge pir suenter ch'il «Sunshine Reggae» è cumparì per la 5avla giada è vegni il success. Numer 9 en svizra e numer 1 en lAustria ed en la Germania, e quai durant sis emnas. La chanzun ha er plaschì ad auters, per exempel ad Udo Jürgens. Sia chanzun «Die Sonne und du» è fitg sumeglianta, quasi la versiun tudestga dal «Sunshine Reggae».
