Hans Fischer, naschi il 1903, ha gì grond success sco impressari ed um d'affar, ed el è stà zunt innovativ. Il 1925 ha el fundà ina interpesa da taxi, ed il 1931 ha el fatg in grond pass, cur che la regenza ha aboli il scumond da camiuns en il Grischun. Cun in Opel Blitz ha el cumenzà a far transports e bain spert è sia firma creschida ad in crescher. Ozendi è quai ina interpresa cun 100 camiuns.
Hans Fischer, il musicant e cumponist
El aveva anc in'autra gronda passiun. Hans Fischer è ina da las figuras legendaras da la musica populara grischuna. In original, grond musicant e cumponist che vegniva er numnà «Grossmufti». El ha cumponì passa 200 sauts, ha sunà cun Luzi Brüesch ed ha fundà il 1939 sia chapella Calanda. Il 1983 ha el survegnì sco emprim musicant grischun la clav da violina d'aur, la distincziun la pli impurtanta da la musica populara svizra.
En l'emissiun dad oz tadlain nus divers da ses sauts enconuschents, registraziuns istoricas e varias exclusivas. Dals onns 1940 datti tocs cun sia chapella Calanda. Anc pli veglias, dal 1929, èn in per registraziuns da la chapella da Luzi Brüesch, cun il giuven Hans Fischer a l'accordeon.
