En in bajetg cun otg moduls pon scolaras e scolars chinais viver ed uschia far l'experientscha da viver sin il planet dal Mars. La basa cun il num «Marsbasis 1» duai sensibilisar ils uffants per temas astronautics e spazials ed er far conscient ad els quant bella che la vita sin terra è.
La China vul far concurrenza
L'idea da la basa dal Mars amez il desert Gobi è dentant ina pli gronda. La China vul marcar sia posiziun e far concurrenza a la Russia ed ils Stadis Unids da l'America. L'idea è da trametter proxim onn ina sonda sin il planet Mars. Pli tard duai er dar ina nav spaziala equipada sin il planet cotschen.