Cun l'Advent app, pon ins elavurar in chalender d'advent sin l'agen telefonin e lura trametter quel ad insatgi. Davos las singulas portas d'advent pon ins chargiar differentas chaussas: fotografias, texts, videos da youtube u gifs.
Fotografias, videos, text e gifs
Fotografias pon ins chargiar si tgeninas ch'ins vul, tut quellas ch'ins ha sin il telefonin, pon ins era chargiar en l'app. Tar las fotos pon ins lura era scriver tiers in text, sch'ins vul. Texts pon ins era chargiar si senza ina foto, pia mo text. Per exempel sch'ins vul scriver in verset u dar enavant in recept dals creflis, ils biscuits preferids ad insatgi.
Per far in zic pli interessant, pon ins era chargiar en videos da youtube davos las portas. Per exempel cun la chanzun preferida da Nadal (Last Christmas da Wham per exempel ;-)) U ch'ins po era metter en in gif, questas animaziuns curtas ch'i dat.
Trametter va be per 1 franc
Cura ch'ins ha lura emplenì tuttas 24 portas cun fotos, videos euv. pon ins lura trametter quest chalender a tgi ch'ins vul. Impurtant è dentant da savair ch'ins po be trametter il chalender ad insatgi che ha era in smartphone. Cura ch'ins survegn numnadamain l'invit per il chalender, ston ins sco emprim chargiar giu l'app sin l'agen telefonin e lura pon ins arver quel ch'ins ha survegnì, sur in link.
Plinavant è l'app bain gratuita da chargiar sin il telefonin ed er d'elavurar il chalender, ma per pudair trametter el ad insatgi, stoss jau pajar 1 franc. Plinavant di la disposiziun da la protecziun da datas ch'ils dretgs per las fotografias restan tar l'autur.
