La band jamaicana Inner Circle è vegnida fundada il 1968, pero blers onns ha ella gì pauc success cun sias reprisas, surtut tocs da Bob Marley e da soul ed R'n'B dals Stadis Unids. Il 1987 hai dà in emprim hit cun «Bad Boys» e lura, tschintg onns pli tard lur hit mundial «Sweat».
La chanzun cumponan els il di da Bumaun dal 1992 suenter ina party en las temperaturas da stad a Florida. Il ritmus da reggae è captivant, il refrain simpel e quai basta per avair bainspert in hit da stad. Il text è pero tut auter che innocent. El raquinta d'in inscunter che promova fantasias: «I want to make you sweat, sweat 'till you can't sweat no more».
I ha dà reacziuns. La chanzun saja sexistica, schizunt vulgara. La band Inner Circle è stada surpraisa da las discussiuns. Els vulevan far ina chanzun simpla e divertenta, han els punctuà. Malgrà las cuntroversas: «Sweat» è daventà in grond semperverd, e per blers simplamain in bel toc per giudair la stad.
