Savevas Vus ch'il turissem è arrivà a Breil grazia ad ina dunna, la Fausta Capaul?
Cura che ses bab mora il 1870, decida la giuvna Fausta da transfurmar la chasa paterna en ina pensiun per turistas e turists. Danunder ch'ella prenda l'inspiraziun e las resursas per realisar sia visiun na san ins betg. Dentant il 1873 publitgescha Fausta Capaul in inserat en la gasetta «Der Freie Rätier», ina publicaziun che po vegnir considerada sco crap da fundament per il turissem a Breil.
En ils decennis che suondan passentan giasts da l'entira Svizra e da l'exteriur lur vacanzas en la Casa Fausta Capaul; alpinists, umens da fatschenta, artists ubain professers ed ina giada vegn schizunt ina regina a gentar!
Funtaunas directas da Fausta Capaul datti strusch, ma grazia a funtaunas secundaras emprova La Marella da purtretar questa dunna curaschusa, quai cun agid da Michael Friberg (Forum Cultural Breil) e cun duas vuschs or da noss archiv da radio, quella dad Otto Friberg (figliol da Fausta Capaul) e dad Elsa Friberg (successura da Fausta Capaul). L'actur David Flepp prelegia passaschas da diversas funtaunas.
