I dat varsaquantas apps per ir per bulieus. Gratuitas e da quellas che custan. Nus avain tschernì duas apps che paran da funcziunar e da persvader.
L'app «Pilzsnap», ch'è nummer in tenor in rapport dal «Kassensturz da SRF» e custa tschintg francs. E l'app Pilzführer Schweiz ch'è la versiun digitala dal cudesch «Pilzführer Schweiz» da l'expert Markus Flück. Quella app custa nov francs. Tuttas duas apps datti per android ed ios.
Las apps funcziuneschan tuttas duas sumegliantamain. Ins fa ina fotografia dal bulieu chattà. L'app di alura tge bulieu ch'ins ha chattà e co che quel ha num. Vitiers datti infurmaziuns tar la cumparsa, la derasaziun e tips e trics davart il rimnar bulieus en general. Ins survegn era l'infurmaziuns sch'ins po mangiar il bulieu u sche quel è da tissi.
Però impurtant: Las applicaziuns na remplazzan betg la visita tar il controllader u la controlladra da bulieus. Ellas èn sulettamain in sustegn.
