Co stgatschar furmiclas or dal dachasa

Furmiclas na mangian betg mo provisiuns, ellas pon era transportar scherms u schizunt chaschunar ch'in cabel brischa.


Ir a la chatscha da furmiclas

Cun barschun e pala pon ins rimnar las furmiclas e smanar ellas ord chasa. Pli svelt vai cun in tschitschapulvra. Impurtant è che las furmiclas na sa zuppan betg en la maschina.


Dischlocar in gnieu

Sch'ins chatta il gnieu pon ins prender in vasch cun strom u stalizzas finas, metter quai sur l'entrada da las furmiclas e spetgar. Cura che las furmiclas èn en il vasch pon ins derscher aua buglienta surengiu u dischlocar il gnieu en in lieu pli adattà.

Armas chemicas
Sprays ed estga cun chemia agressiva duessan ins evitar, sur tut sch'ins ha uffants u animals.


Armas natiralas

Il pli renumnà med da chasa è la pulvra da levon. Sch'ins maschaida quella cun zutger lura mangian las furmiclas quai. La pulvra sa scufla en ils venters e las furmiclas schloppan. Pli pauc crudaivel èn chaussas che oduran ferm, sco per exempel agl, pulvra da chanella, neghels, ginaivra, timian ed ielis eterics.


Traplas magicas

I dat duas traplas per rimnar furmiclas. Ina spungia cun aschieu attira las furmiclas, uschia ch'ins po laschar ir ellas dal bigl giuaden. U ch'ins prenda in taglier da schuppa, emplaina quel cun gervosa e zutger, lura baivan las furmiclas questa maschaida, daventan sturnas e najan.


Lultim salvament

Sche nagut gida, ni sch'il gnieu è aifer ils mirs, lura èsi da clamar ils experts.