Ina band tudestga da Pforzheim fa concerts cun in pèr aspectaturs. In da lur tocs è vegni dovrà per ina reclama da televisiun. È quai il success che Peter Freudenthaler, Volker Hinkel e lur band Fools Garden avevan spetgà? Segiramain betg!
Il hit ch'ha midà lur vita e lur carriera è però vegnì ina dumengia suentermezdi il 1995. Freudenthaler spetgava gist sin si'amia. Ord lungurella ha el empruvà da scriver inqual nota e tuttenina ha el scrit in'entira melodia, simpla e tuttina captivanta. 20 minutas pli tard ha el er in text e là vegn avant in citroner, in «Lemon Tree».
Atgnamain era quai in'idea in pau sturna. I tunava però bain ed uschia esi restà tar quest titel. Cur che la chanzun è cumparida sin il disc «Dish of the day» e sco single ha cumenzà il temp il pli turbulent en la vita dals musicists da Fools Garden: Nr. 1 en la parada da la Germania ed Austria, nr. 2 en Svizra, termins da pressa, far videos e turneas. Perquai ch'els n'avevan nagin'idea e nagin'experientscha esi stà pulit caotic ed els eran surdumandads cumplettamain.
«Lemon Tree» è restà lur unic hit, ed er ina chanzun difficila per els. Nagin è s'interessà per tut tschellas chanzuns da Fools Garden, ed il citroner als persequitescha perquai anc adina.
