Bleras persunas fan d'Ascensiun la punt e giaudan la fin d'emna prolungada en il sid. E cura che tants van envers il sid datti era colonnas al Gottard. Viasuisse quinta la mesemna suentermezdi sco era la gievgia cun colonnas enfin 10 kilometers. Quai correspunda ad in temp da spetga da bunamain duas uras. La sonda sco era la dumengia èsi da quintar cun lungas colonnas avant il portal dal nord. Era lura prognostitgescha Viasuisse colonnas da bun 10 kilometers.
Co sviar il traffic
Tgi che less sviar il grond traffic sa far quai cun ir la damaun fitg baud en direcziun sid. Dal sid en direcziun nord cusseglia Viasuisse da betg turnar la sonda u la dumengia suentermezdi. Il meglier fiss da charrar a chasa u la sonda saira suenter las 10 ubain la dumengia tard.