Igl è il pli vegl center alternativ da giuvenils (en questa moda) en la Svizra: la veglia pigna da stgaudar a Bienna. En la citad bilingua din ins plain amur: il «Chessu» u la «Coupole».
Dapi 40 onns datti quest lieu alternativ, in spazi liber per la giuventetgna, per star pacific ensemen e tadlar concerts da punk, rock, reggae u hip hop. Pli baud era quai in pau in lieu malvis, cun in terrain nuncultivà, circumdà da firmas da construcziuns, dasper ils binaris.
Oz dentant è il «Chessu» etablì e bain acceptà. Ma pervia che Bienna crescha e crescha, stat quest center alternativ gia bainbaud en in conturn schic e commerzialisà. Ussa teman ins che quai pudess dar conflicts.
