Wings: «Mull fo Kintyre»

Suenter la separaziun dals Beatles ha Paul McCartney duvrà in pau distanza da tut il travasch, e perquai è el sa retratgs sin ses bain pauril en Scozia, sin la peninsla «Mull Of Kintyre». Là ha el chattà quietezza ed è er s'occuppà da la musica da la Scozia, ina regiun ch'el amava zunt, pertge dapi il 1966 aveva el là ses segund dachasa. Blera musica nova da quellas varts n'ha el pero betg chattà, e perquai ha el pensà da cumponir ina chanzun ed el ha scrit in text davart in giuven ch'era viagià en blers pajais e ch'è turnà lura a chasa. Cur che la chanzun era pronta mancava pero l'atmosfera tipica da la Scozia, e perquai è el ì tar Tony Wilson. Quel era il manader da la chapella da cornamusas locala e gia davo l'emprima prova era tut cler. McCarntey ha engaschà l'entira chapella ed ha registrà il toc ensembel cun sia band, cun ils «Wings». El savess ha sunà la ghitarra accustica ed ha chantà, e quai è vegni registrà tar el a chasa davant porta. La chanzun è cumparida la fin dal 1977, ed è rivada in blers pajais sin l'emprima plazza: en Svizra, Germania, Australia, Irlanda ed er en Engalterra. Là è ella vegnida vendida sur 2 milliuns giadas, in success ch'ils Beatles n'han mai gì.