Ins na dastga strusch dir – dunnas dirigentas eran fitg, fitg stgarsas qua tar nus. Oz èn ellas anc adina en la minoritad. En ina seria emprova l'Artg musical da s'avischinar al tema «La dunna Rumantscha en la musica»; la dunna sco dirigenta, interpreta u solista, sco cumponista u poeta (furnitura da texts per cumposiziuns). L'emprima part da questa seria è deditgada a la dunna dirigenta a festas da chant e musica en il Grischun. Nossas festas districtualas da chant e musica dals decennis passads, mussan qua in maletg trist e monoton. Surtut tar las musicas era la quota da dirigentas pli che magra ed ils davos decennis n'hai strusch dà in augment. Tar noss chors vesa quel svilup ora in zic meglier. L'Artg musical ha cumpareglià las emprimas festas registradas da RTR (entschatta dals onns 1980) cun las davosas (2014-17). (Artg 14-03-2021 – La dunna dirigenta, 2. part).
Redacziun: Giusep G. Decurtins
