Sco pli emprim pon ins envidar ils conabitants (u era ils commembers da la famiglia u il partenari) dad era chargiar giu l'app e lura pon els entrar cun agid d'in code en la medema survista. Sco emprim han ins ina tabla naira, nua ch'ins po scriver als collegas sco en in chat da gruppa da whatsapp. Là cumpara era ina novitad sch'insatgi ha ademplì in pensum.
Cumissiuns
Flatastic ha vinavant er ina glista da menu nua ch'ins po scriver ina glista da cumissiuns. Là pon tuts scriver en tge ch'i dovran e quel che fa las cumissiuns po lura far en in crutsch tar las chaussas cumpradas. Uschia han ins la survista.
Finanzas
Ma er las finanzas pon ins reglar cun l'app. Ins po dar en divers custs fixs sco per exempel il tschains da l'abitaziun e divers abunaments sco quel per la televisiun. L'app quinta lura ora quant che sto en tut vegnir pajà e lura pon ins parter si ils custs. Ma er sch'ins ha da parter si ils custs per las cumissiuns funcziuna quai. Ins po dar en sut finanzas quant ch'ins ha pajà per la cumissiun e lura quinta l'app ora quant che tschels han da pajar.
Nettegiar
In punct che dat er savens discussiuns è il nettegiar. Tar l'app pon ins lura dar en tut las stanzas ch'ins ha en abitaziun. Ins po era dar en quant savens che quellas stanzas duain vegnir nettegiadas. L'app fa lura endament a mintgin tge ch'el ha a far ed ins po era far endament a tschels ch'i stuessan far lur pensum. Er il turnus da tgi che la stanza duai vegnir nettegiada pon ins inditgar a l'app. Ins vesa lura er adina tgi che vidlonder sco proxim.
