Al Jarreau, naschì ils 12 da mars dal 1940 e mort ils 12 da favrer da l'onn passà, è stà in dals gronds chantadurs, in vair acrobat da vusch. El è l'unic chantadur che ha survegnì in Grammy en trais categorias: Pop, R'n'B e jazz – e dad el datti blers tocs impressiunants.
In dals pli enconuschents è «Boogie down», cumparì il 1983 sin ses 6avel disc «Jarreau». Là mussa el ina giada dapli sia capacitad unica da schonglar cun ils tuns e sia vusch dat a la chanzun in'expressiun fitg ferma ed intensiva. Quellas abilitads ha el survegnì grazia a ses engaschament, el ha exercità e trenà uras ed uras per rivar sin quest livel.
E lura ha el gì sustegn da ses producent Jay Graydon che ha engaschà musicists da renum sco Jerry Hey, Steve Gadd, Jeff Porcaro e David Foster. Il disc è in nr. 1 en las paradas da jazz e la single «Boogie down» daventa in dals tocs ils pli enconuschents dad Al Jarreau.
