Ils 11 da december dal 1964 è mort in dals chantadurs e cumponists da soul ils pli impurtants, e quai cun be 33 onns: Sam Cooke. El è naschì il 1931 a Clarksdale, Mississippi e già da giuven ha el fatg musica cun ses frar Charles – ed els dus han er chantà en la furmaziun da gospel da lur famiglia. Pli tard è Sam daventà in dals interprets ils pli impurtants dal soul ed el ha interpretà numerus hits.
Ses emprim è stà la bella ballada «You send me», ina da sias cumposiziuns ch'el ha registrà a Hollywood il 1957. Il success è stà enorm. Nr. 1 en la parada da soul e tar ils «Hot 100» da Billboard. El ha lura anc gì blers hits sco «What a wonderful World» e «Chain Gang» ed ha fatg via per chantaduras e chantadurs da soul sco Aretha Franklin, Al Green, Curtis Mayfield e Marvin Gaye. Ils 11 da december dal 1964 è el vegnì assassinà en in motel a Los Angeles e las circumstanzas da sia mort n'èn fin oz betg scleridas.
