Tiago Ferreira e sia mamma Manuela Flores De Figueiredo avevan ina pitschna butia cun in café a Sedrun. Damai che la vischnanca dovra dentant il local per in auter intent han els stuì dar si quella. Uschia han els tschertgà insatge auter e chattà locals adattads a Trun en lanteriura ustaria Dulezi. Lustaria che ha da nov num Cantinho de Portugal porscha plaz per 120 persunas. Manuela Flores De Figueiredo che maina lustaria cuschina era gist sezza.
Purschidas vegnan cunzunt spezialitads portugaisas. Quai èn savens tratgas cun peschs. Sco Tiago Ferreira di hajan els explicit vulì porscher insatge chi na dat anc betg en la regiun. I na saja betg ina ustaria mo per Portugais, tut ils giasts sajan cordialmain bainvegnids. Ils indigens laschan lura era plaschair che lustaria saja puspè averta. Els vegnian gugent a baiver in café.
Era la bar è puspè averta
Ina part da lustaria dat spazi a la butia che la famiglia ha stuì serrar a Sedrun. En quella datti cunzunt chaussas portugaisas chins na chatta uschiglio betg en butias indigenas. Lustaria è averta da mardi fin dumengia. Venderdi e sonda è era mintgamai la bar averta da las 23.00 fin las 4.00 uras.
Ina tala purschida na dettia quai betg en il conturn di Tiago Ferreira. Quai saja stà ina raschun chels hajan era prendi a tschains quest local. I saja in manaschi da famiglia. Ses bab che lavuria sco miradur sa gidia cun els, e schi dovria ulteriur agid, possian els dumandar enconuschents.
