Rosamunde Pilcher è naschida il 1924 a Cornwall è creschida si en l'Engalterra. Durant la segunda guerra mundiala ha ella fatg servetsch militar ed è era stada staziunada en l'India. Suenter sia maridaglia ha ella vivì en Scozia. Ella è mamma da 4 uffants.
Gia en la vegliadetgna da 15 onns ha Rosamunde Pilcher cumenzà a scriver, l'emprim istorgias curtas, pli tard romans. Sias istorgias plain scumbigls d'amur e destins tragics fineschan savens cun in happy end per ils buns. Situadas èn las istorgias da Rosamunde Pilcher pil en las cuntradas, ils chastels e las villas da Cornwall u Devon en l'Engalterra, dentant era en Scozia. Che sia litteratura è vegnida taxada per triviala e kitsch n'ha betg disturbà l'autura da success che ha savens scrit a la maisa-cuschina. En ils pajais da lingua tudestga è Rosamunde Pilcher cunzunt enconuschenta entras ils films da televisiun romantics.
