Ils «Doobie Brothers» èn ina da las bands da rock californianas legendaras. Els èn vegnids fundads il 1970 dal chantadur e ghitarrist Tom Johnston ed el ha er cumponì blers da ses semperverds sco «China Grove», «Listen to the music» e «Rockin down the highway». Il pli enconuschent è pero senza dubi «Long train runnin'», il toc cun ses riff da ghitarra captivant ed electrisant.
Johnston ha pero da morder fin che la cumposiziun è finida. La melodia ha el spert, e quella sunan els adina puspè er sin il palc, pero il text mida el diversas giadas ed il pli difficil para d'esser il titel. La chanzun survegn blers ed adina puspè datti midadas. Da «Rosie Pig Moseley» tar «Osborn» ed a la fin lura tar il definitiv «Long train runnin'».
Uschia passan 3 onns fin che la chanzun è pronta per registrar. Cun ses sound cun 3 ghitarras, il chant a pliras vuschs ed il solo d'orgelet da bucca da Tom Johnston daventa el pero in hit, surtut en ils Stadis Unids e Canada.
