Cun ses hobi ha Albert Cavegn cumenzà 1987. L'emprim ha el fatg in clavà da fantasia. El lavurava surtut l'enviern, cura ch'el n'aveva betg blera lavur en sia professiun sco miradur e polier (el ha era gì sez ina interpresa da construcziun).
La dunna fascheva fotografias
Sia dunna Maria gidava el. Ella fascheva las fotografias dals bajetgs. Per construir ina chasa stueva Albert Cavegn impunder ca. 400 uras; per far in tetg duvrava el ca. 4'000 schlondas. El lavurava cun materials originals, perfin la colur era originala.
Finamira da construir in vitg
Sia finamira era da construir in vitg tuatschin, di sia dunna. Gugent avess el era fatg ina copia da l'hotel la Cruna a Sedrun, mo quai na saja betg grategià. Cun l'exposiziun va in giavisch da l'artist tuatschin en vigur. I saja stà ses giavisch, che ses bajetgs vegnian mussads a la populaziun, di sia dunna.