Elton John ha vendì passa 250 milliuns discs ed è - cun passa 346 milliuns francs - il quart ritg musicist dal mund. Dentant er la vita da Elton John ha pliras varts.
Durant ils onns 80 è el stà ferm dependent da cocain. La droga haja pir dà ad el la forza da sa preschentar sin tribuna, da pudair discurrer cun la glieud, ha el ditg envers l'emettur da radio american NPR. Elton John è dentant sa decidì per ina cura ed uschia vegnì ord las drogas.
Ina via extraordinaria a la musica
En la vegliadetgna da quatter onns ha Elton John emprendì da sunar clavazin a moda autodidactica. Er sche ses bab n'ha betg sustegnì ils plans da ses fegl naschì oriund cun il num Reginald Kenneth Dwight, ha el bandunà cun 17 onns la scola per fundar ina band.
Gia cun 20 onns ha Elton John scrit ses emprims hits sco Crocodile Rock, Bennie and the Jets ubain Island Girl. Dapi il 1970 va el adina puspè sin turnea tras l'entir mund e scriva in hit suenter l'auter.
Amicizias spezialas e l'agid cunter SIDA
Sco um bisexual è Elton John adina s'engaschà per glieud cun SIDA. Tras quai ha el er gì ina lunga e ferma amicizia cun Lady Diana. Per ella ha Elton John sunà ina nova versiun da ses pli grond hit Candle in the Wind durant la sepultura en il Westminster l'onn 1997.
Elton John è dal reminent stà l'emprim um che ha maridà ses partenari actual David Furnish cura che lètgs tranter omosexuals èn vegnidas legalisadas en l'Engalterra il 2014. Sia emprima lètg cun la tecnicista da tun tudestga Renate Blauel è ida dapart il 1988 suenter be quatter onns.