I ha funcziunà, quai era cler gia da pausa. Ils visitaders da la premiera eran plain laud e faschevan ponderaziuns tge che pudess tut anc schabegiar en questa stanza da spetga.
«La lingia blaua» gioga en la stanza da spetga dal medi Monn e qua s'entaupan da tutta glieud. Baterluns e baterlieras, sportists, purs giuvens e vegls.
In tema han tuts, numnadamain il maletg d'art che penda vid la paraid en sala da spetga. Ina lingia blaua sin in funs alv e finì. I vegn filosofà sur da quest maletg e mintgin è sez dapli artist che l'artist sez.
Celebrar l'art modern
Quai contemplar il maletg en stanza da spetga vegn celebrà a moda fitg speziala. En il maletg e zuppà ina camera. Il maletg da la camera vegn projectà sin ina tenda. Ed il public sa uschia mirar en fatscha al giugader durant che quel contempla il maletg. Ins ha pia il dies dal giugader sin la tribuna e la fatscha davant en sco maletg da video.
Reschia ed autur giogan cun il public a moda fitg speziala. Il maletg «La lingia blaua» patescha durant las differentas acziuns e la finala daventa il maletg in cas d'assicuranza. Dapli dastgan ins betg tradir dal cuntegn.
Emprim toc d'Erwin Caduff
A l'autur èsi gartegià da scriver dialogs che regordan adina puspè als caracters da Loriot (Vicco von Bülow). Persunas che van ad ins sin la gnerva. Da quellas che baterlan senza punct e comma. Ils visitaders da la premiera han gì la quaida da vesair il chantadur Pasqual Gamboni direct. El ha chantà pliras chanzuns durant il teater. Mintgamai chanzuns che sustegnan il toc e sia tematica.
