Emprender in linguatg cura ch'ins vul, nua ch'ins vul e quant ditg ch'ins vul – cun l'app Duolingo è quai pussaivel. Tgi che sa gia in pau in linguatg, fa l'emprim in pitschen test e sa suenter far exercizis tenor ses nivel. Sper translatar curtas construcziuns ed emprender novs pleds, datti era exercizis da pronunzia. Ed ils principiants entschaivan cun exercizis fitg simpels.
Cun l'app Duolingo san ins davent dal tudestg emprender englais, franzos u spagnol. Sch'ins sa gia fitg bain englais, lura san ins davent da quest linguatg emprender var 20 differents linguatgs. Per exempel era russ, vietnamais, ungarais ubain ebraic.
L'app datti per Android, iOS e Windows Phone. E tgi ch'emprenda pli gugent vi dal computer, ha era questa pussaivladad.
