L'artista universala, oriunda da Laax, ha in agen biro da communicaziun e grafica e lavura per ils pli divers clients. Dentant quasi mai per la baselgia.
Cun far art per la baselgia ins sa movia adina sin glatsch satigl, perquai ch'ins stoppia far adatg da betg violar sentiments religius ed era chapir endretg cuntegns religius. Ed alura na tutgia l'art natiralmain er betg il gust d'in e mintgina. Da chattar in access e chapir l'art abstract saja da l'autra vart era betg adina simpel per il public.
Dentant lavurass Anna Rita Stoffel fitg gugent dapli per incumbensa da la baselgia, perquai che tenor ella possian ins elavurar fitg bain tematicas da la cardientscha da moda artistica. En la religiun sco er en l'art giaja per la vita, il senn da la vita, la vardad, l'amur, la mort.
Sco che la baselgia pudess profitar da l'art contemporan e viceversa, sco che baselgia e religiun savessan inspirar artists, quai explitgescha l'artista en Vita e cretta.
