Qua e là datti chanzuns ch'occupan durant emnas e mais l'emprim plaz da las parada da hits, per exempel Ed Sheeran e Luis Fonsi. Lur hits èn stads 20 emnas il numer 1 en Svizra.
Il 1991 ha er Bryan Adams gì in grond hit. El aveva cumponì la chanzun cun Robert John Lange e Michael Kamen per il film «Robin Hood» cun Kevin Kostner. Para che tut era già stà pront suenter 45 minuts, ed els eran persvadì d'avair cumponì insatge special cun grond potenzial da hit.
La ballada «(Everything I Do) I Do It for You» plain passiun e la vusch gruglia dad Adams cumpara sco single. Ella daventa in dals pli gronds hits dals onns 90, sa venda 15 milliuns giadas e vegn en 30 pajais sin l'emprim plaz da las paradas da hits – er en Svizra. Tar nus occupa ella durant 16 emnas, dals 4 avust fin ils 16 da november, la top-posiziun.
