Simply Red, la band da Manchester cun il chantadur Mick Hucknall, ha vendì sur 50 milliuns discs. Ed els han gì hits sco «If You Don't Know Me By Now», «Holding Back The Years» e «Something Got Me Started». Lur emprim hit, dal 1985, è stà «Money's Too Tight (To Mention)», ina reprisa d'in toc dal duo american «The Valentine Brothers».
La chanzun raquinta d'in giuven che ha problems finanzials, sco blers auters en quests temps da recessiun en ils Stadis Unids. Er John e William Valentine han fatg tras temps difficils, cun pauca lavur ed anc pli paucs raps. Perquai han els chantà las sairas en bars e clubs e quai als ha gidà da sa tegnair sur l'aua.
Lur chanzun n'è betg stada in success, però en la versiun da Simply Red cun la vusch marcanta da Mick Hucknall è ella daventada in semperverd – ed ha emplenì la cassa dals cumponists, ils frars Valentine.
