Sco regal devi in mail, in fazielet ubain tscheppa da lain

Il 20avel tschientaner ha senza dubi midà nossas tradiziuns e valurs – era quellas dal temp d'advent. En sia exposiziun actuala propona il Museum Regiunal Surselva in viadi enavos en l'advent d'antruras, quai cun sa basar sin quai ch'ins numna «istorgia orala».

Dapi l'avrigl 2019 è Ursina Jecklin nova manadra e curatura dal museum. Bainprest haja ella cumenzà a retschertgar davart usits e tradiziuns d'advent en la regiun – quai era per emprender d'enconuscher in zic meglier ses nov lieu da lavur. Ma ella haja stuì constatar ch'i na dettia gnanc blera documentaziun. Uschia han ella e ses collavuraturs visità diversas persunas da l'entira Surselva e registrà lur regurdientschas – ordlonder hai ussa dà in'exposiziun che mussa bain l'incredibel svilup economic e social ch'ha transfurmà nossas regiuns ils ultims decennis.