Survivor: «Eye of the tiger»

Il 1982 cumpara il film «Rocky III» da e cun Silvester Stallone. En ses films ha la musica adina ina rolla impurtanta ed usche tschercha el ina chanzun adattada, ina cun ina buna purziun schlantsch ed aggressivitad. Ses favurit è «Another One Bites the Dust» da Queen, pero Freddie Mercury e ses collegas na dan betg il permiss. I segua il plan B e Stallone dumonda la band da rock Americana pauc enconuschenta «Survivor», ed el ha in bun nas. Il ghitarrist Frankie Sullivan ed il keyboardist Jim Peterik cumponan il toc «Eye of the tiger», e quel è sco fatg per in film cun scenas da cumbat. Il sucess è enorm, e grazia ad MTV e las staziuns da radio è la chanzun bainspert davantvart en las paradas da hits da tut il mund.