Lukas Bärfuss è naschì a Thun en il chantun Berna. L'um da 47 onns sa fatschenta dapi 21 onns cun litteratura. Sia fascinaziun è sa sviluppà per schabetg. Suenter 9 onns ha el numnadamain bandunà la scola primara ed è silsuenter ì a lavurar sco orticultur, tschentafier e pur da tubac. Il Tages-Anzeiger scriva che Bärfuss haja adina gì plazzas da lavur miserablas. Ina da quellas lavurs haja dentant gidà ad el da chattar sia passiun.
Leger ed alura scriver
In temp ha el numnadamain lavurà en ina libraria, nua ch'el è vegnì en contact cun litteratura. Da là ha el legì bler ed ha entschet da scriver sez. Entaifer 21 onns ha el lura scrit blers romans, tocs da teater ed essays. Il success n'ha betg laschà spetgar ditg. Pli che 20 premis ha el gia guadagnà en sia carriera. Ussa survegn el perfin il premi Georg Büchner che vegn valità sco il pli impurtant premi da litteratura en ils pajais da linguatg tudestg.
