La fin dals onns 60 datti en la California ina band che fa furore cun ses rock cun elemaints latins. «Santana». Ella daventa ina band cun status da cult e venda durant sia carriera sur 100 milliuns albums. Las registraziuns dal emprim disc il schaner 1969 èn pero difficilas, e la band è pauc cuntenta cun il resultat.
Els provan anc ina giada, cun agid dal impresario Bill Graham. Quel cusseglia da registrar il toc «Evil Ways», ina cumposiziun da Clarence Henry vegnida enconuschenta en la versiun da jazz latin da Willie Bobo. In toc che ha influenzà fermamaing la musica da Santana. Lur emprim disc «Santana» cumpara in avust dal 1969, riva sin plazza 4 da la parada americana, e la single «Evil Ways» sa platga sin plazza 9. Ina buna partenza cun in toc che mussa cleramain la direcziun. Rock cun elements da musica latina, in text plitost curt e simpel e blers solos d'orgel e surtut da la ghitarra da Carlos Santana.
