Avant bundant trais emnas è vegnì terminà il tunnel tras il Monte Ceneri, l'ultima part da la transversala da las Alps NEAT. Ina modesta festa d'inauguraziun ha tuttina mussà quant impurtant che quest nov implant da viafier è.
Enfin a l'inauguraziun da la viafier tras il Monte Ceneri era il chantun Tessin dividì en Sopra- e Sottoceneri. Gia ils Romans numnavan el Mons Ceneris, e la furma dal plural pon ins declerar bain cun il num inter: Monte delle Ceneri. Quai correspunda al num da noss chantun en talian, «Il Grigioni» è la furma curta per «Il Cantone dei Grigioni». Er en Grischun datti varsaquants nums cun tschendra.