Siglir tar il cuntegn

Header

audio
Keystone
laschar ir. Durada: 6 minutas 41 Secundas.
cuntegn

La Russia blochescha adina dapli paginas d'internet

La regenza russa vul la controlla totala davart las infurmaziuns che la populaziun survegn. Per far quai blochescha la regenza paginas popularas dal vest. Uschia datti pli e pli fitg in internet separà en il pajais.

Actualmain èsi in scenari realistic che la Russia pudess far il medem sco la China e l'Iran e sviluppeschia pli e pli fitg ses agen internet. Pertge la Russia scumonda adina dapli paginas d'internet dal vest per sia populaziun. Uschia na funcziunan per exempel Twitter u Facebook betg pli en il pajais.

VPN per sviar las dumondas

Tecnicamain n'è quai nagin problem per in stadi da bloccar paginas. Quai fa er la Svizra. Per exempel paginas da casinos da l'exteriur. La raschun è che nossa lescha prescriva che quels èn scumandads. Ins po dentant guntgir quai cun in uschenumnà purschider da VPN. Quel trametta lura la dumonda per l'access ad ina pagina uschia, ch'i guarda ora sco sche quella vegniss d'in auter pajais.

Il problem è uss che la populaziun russa ha entras las sancziuns da Mastercard e Visa che han tschentà giu lur servetschs en Russia, betg pli la pussaivladad da pajar in tal servetsch da l'exteriur. Ed en Russia sezza vegnan tals purschiders bloccads. Dentant pon ins sa dumandar quantas stentas che la regenza fa propi da persequitar a moda severa tals purschiders, damai che be ina fitg pitschna part da la populaziun dovra propi quels.

Paginas betg pli legiblas

Pli bleras paginas che la Russia blochescha e dapli donns ch'ella fa er a sa sezza. Uschia vegnan per exempel blers codes per scrittiras che nus vesain mintga di, da Microsoft. Sche la Russia bloccass uss cumplettamain ils servetschs da Microsoft, na funcziunassan ils codes necessaris betg pli e bleras paginas na fissan betg pli legiblas. U er updates per ils computers mancassan, sche Wladimir Putin separass l'internet russ da l'internet global.

Dapli da «Il Digitip - il tip digital»

Scrollar a sanestra Scrollar a dretga