Waterloo & Robinson, ils dus chantadurs Hans Kreuzmayr e Josef Krassnitzer èn gia enconuschents en l'Austria ed els han er in pèr hits pli pitschens. Il 1974 è però lur onn. Surtut la chanzun «Hollywood», daventa in mega-hit, in toc cumponì da Christian Kolonovits ch'ha pli tard era procurà per hits tar Wolfgang Ambros, Ludwig Hirsch, Reinhard Fendrich e la Erste Allgemeine Verunsicherung.
Il success è sta enorm e cun quai era la preschientscha en l'Austria, Germania e Svizra. Surtut en lur patria capita insatge unic: En la parada da hits da l'Austria èn a partir dal zercladur 1974 fin la fin da l'onn cun «Hollywood» e «Baby Blue» gist dus da lur chanzuns alternond sin las emprimas duas plazzas. E sch'il radio austriac n'avess betg decis d'abolir la parada da hits avess quell'istorgia da success cuntinuà.
Waterloo & Robinson han però novs hits, surtut en Germania, fin ch'els sa separan il 1981.
