Il 1979 ha Jonny Hill in grond hit, in semperverd che tucca il cor cun ina melodia da country ed el che raquinta, senza chantar.
La firma discografica dal chantadur oriund da Graz vuleva prender ina chanzun da country americana e far cun quella ina versiun tudestga. En dumonda vegnivan «Lucille», «Detroit City» ubain «Ring of fire». Jonny Hill ha però chattà in'autra chanzun, ina da Red Sovine, cun il titel «Teddy Bear». Quella raquinta d'in mattet schirà che ha contact per funk cun in manischunz da camiun. Jonny Hill è stà commuventà ed ha fatg in text tudestg, er sch'el saveva che tematisar in impediment en ina chanzun era quella giada zunt difficil. La firma discografica ha gì pauc plaschair ed er las staziuns da radio han l'emprim boicottà «Ruf Teddybär eins-vier». Quella istorgia che rumpa il cor era al fauss lieu sper ils tocs da disco da quel temp. La chanzun è però tuttina vegnida en las paradas da hits e per Jonny Hill il pli grond success da sia carriera. Uss ha el 77 onns e suenter ch'el ha vivì 30 onns a Hamburg stat el uss en Svizra, a Weinfelden.
