Che bleras persunas sa drizzan tenor la glina en dumondas d'iert, cura lavar las fanestras u era tagliar ils chavels n'è betg pli uschè spezial sco forsa avant in pèr onns. Ed ils chalenders da la glina sin palpiri èn enconuschents a blers. Ma era en il mund digital datti pliras applicaziuns che mussan il ciclus da la glina e che dattan alura era gist l'infurmaziun giavischada. La schelta è tant per iOS sco era per Android fitg gronda. Las bleras da questas applicaziuns pon vegnir chargiadas giu gratuit, ma per infurmaziuns detagliadas e tips èsi savens da pajar per ellas.
MoonWorx – attractiv e simpel en il diever
L'applicaziun «MoonWorx» ha persvas perquai ch'ella è fitg multifara. Uschia porscha l'applicaziun ils singuls servetschs da differentas applicaziuns en ina ed era il pretsch constat. En emprima lingia datti bleras infurmaziuns generalas, ma ì dat era cussegls per pliras categorias dal mintgadi, sco per exempel, nutriment, iert, sanadad, tegnairchasa, igiena corporala e tar chavels. Ma dasper tut quellas infurmaziuns datti era servetschs fitg persunals gist tenor la data da naschientscha e uschia tenor l'agen ritmus biologic. L'applicaziun po vegnir chargiada giu gratuit ma per dapli cuntegns custa ella: per telefonins cun il sistem da iOS 3.- francs e 2,23 francs per il sistem d'Android.