The Highwaymen: «Highwayman»

Avant 80 onns è naschi en il texas in dals gronds da la musica da country americana: Waylon Arnold Jennings. El ha er fatg part d'ina supergruppa da country ch'è vegnida enconuschenta pervi da la chanzun ch'è ha er da il num a quel quartet. «Highwayman» è ina cumposiziun dal chantautur american Jimmy Webb. Ella è cumparida il 1977 sin in da ses albums, pero senza avair grond success. In onn pli tard datti ina versiun da Glenn Campbell e Webb aveva er offri la chanzun a Jennings, che n'è pero betg stà interessa. Il 1985 daventa la chanzun pero in hit e semperverd. Quella giada eran Waylon Jennings, Willie Nelson, Kris Kristofferson e Johnny Cash per cas en Svizra per far in'emissiun da televisiun, ed els quatter han decis da far in disc. Pli tard, durant las registraziuns, han els udi casualmain ina versiun da «Highwayman» ed han ha tscherni il titel sco num per lur band ed han er registra il toc. Lur versiun è daventada in hit da country in America dal nord, e quella chanzun era sco fatga aposta per els. I va per quatter tips differents che raquintan da lur vita e da lur mort, e mintgin dals stars da country ha surprendi ina strofa. Willie Nelson chanta dal «Highwayman», da quel che assaglia las charrotschas da posta, Kris Kristofferson è il mariner, Waylon Jennings construescha rempars e Johnny Cash sco ultim chanta da sia missiun sco chapitani d'ina nav spaziala. Pel cumponist Jimmy Webb in'onur d'udir a Cash che chanta l'ultima strofa, er sche quel ha realisà pir pli tard ch'il text da «Highwayman» tracta la reincarnaziun.