Ils Doors èn vegnids furmads il 1965 e nagin na saveva quella giada tge forza artistica che quella band survegniss. Ils musicists John Densmore, Ray Manzarek, Robbie Krieger e surtut il chantadur carismatic Jim Morrison han preschentà avant 50 onns lur emprim disc «The Doors» e sco emprima single «Break on Trough (to the other side)». Gia quella ha procurà per discussiuns, pervi da la lingia da text «She gets high» ch'è vegnida assoziada cun consum da drogas.
La firma discografica ha reagì ed ha laschà far pauc pli tard ina versiun nova senza «High». Questa versiun censurada è er quella che va en tut ils radios e schizunt sin I-Tunes datti questa versiun – e be ils gronds amaturs dals Doors provan da chattar il toc cun il text original.
In success commerzial n'è lur emprima single betg stada, però surtut pervi dal chant da Morrison ed ils tuns d'orgla da Manzarek è quest toc daventà lur senn da marca, ed ils Doors han cuntanschì status da cult.
