In «Ruck» stoppia ir tras la Svizra. Cun quels pleds ha la cussegliera federala Simonetta Sommaruga gì proclamà avant bunamain precis in onn la situaziun extraordinaria per l'entira Svizra. La consequenza: restaurants, butias, indrizs da divertiment e da sport han serrà las portas, las scolas eran vidas, l'armada è vegnida mobilisada ed ils cunfins serrads. Dapi lura ha il coronavirus midà bler. A la lavur, ma era en la vita privata, per la moda e maniera co che nus communitgain, en la politica. E la crisa nè anc betg dumagnada.
En in'episoda speziala dal podcast Café federal dattan Fabia Caduff ed Adrian Camartin in sguard persunal sin quest onn turbulent. La correspundenta ed il correspundent da RTR a Berna han visità persunas che han sentì las consequenzas da las decisiuns. Il viticultur, l'assistenta pastorala, la dunna en speranza e la mamma cun l'uffant novnaschì, sco er Annetta Bundi. La scheffa da medias da la cussegliera federala ha discurrì davart la difficultad da chattar ils dretgs pleds per sa drizzar a la naziun en ina situaziun difficila.
