Siglir tar il cuntegn

Header

audio
Ciril Friberg guarda la carta panoramica cun ils nums locals.
RTR, Gion Hosang
laschar ir. Durada: 2 minutas 33 Secundas.
cuntegn

Charta panoramica cun ils nums locals da Breil

Il Forum cultural vischnanca da Breil ha edì ina charta panoramica cun ils nums locals da la vischnanca da Breil.

Radund 1'000 nums locals ha Ciril Friberg, il president dal Forum cultural vischnanca da Breil e ses gidanters rimnà ils davos quatter onns. Uschia vulan ins evitar che quests van a perder. Pervia da las meglieraziuns èn ils prads vegnids mess ensemen e vegnids barattads ed uschia van era ils nums a perder. Quai han ins vulì evitar, declera Ciril Friberg. Anc dettia quai persunas ch'enconuschian ils nums e quels hajan ins dumandà.

Ils nums èn vegnids plazzadas sin ina charta panoramica. Vul dir ch'igl è vegnì fatg fotografias da tut las parts da la vischnanca nua ch'ins ha marcà ils nums. La charta è faudada sco ina charta da viandar. Tenor Ciril Friberg saja quai in bun format, perquai che lura possian ins prender quella cun sai cura ch'ins giaja a viandar u si culm. Ils custs per il project muntan a 10'000 francs. Ina part da quests custs ha la vischnanca da Breil surpiglià. Persuenter survegnan tut ils vischins e possessurs d'abitaziuns secundaras ina tala charta. En tut èn 4'000 chartas vegnidas stampadas. Quellas pon era vegnir retratgas tar il Forum cultural vischnanca da Breil per 10 francs.

Dapli da «Total local»

Scrollar a sanestra Scrollar a dretga