En il traffic tschiff'ins 90% da las infurmaziuns sur ils egls. Pauc surprendent, ch'ils blers accidents capittan cur ch'igl è stgir. Per vegnir vesì èsi impurtant da trair en vestgadira clera u anc meglier reflecturs. Vestgadira stgira vezz'ins be sin 25 meters, clera sin 50 meters e reflecturs sin var 140 meters.
Sin il velo èsi anc impurtant d'avair las glischs prescrittas. En pli èn reflecturs vi dals pedals ed ils radis da la roda fitg buns.
Protecziun en moda
Adina dapli giaccas e tastgas han integrà en lur design material che reflectescha. Tgi che ha pli gugent accessoirs: I dat era schals, bratschlets u ureglins che reflecteschan. Anc insatge extraordinari: I dat schizunt in spray che reflectescha la glisch. Simplamain sprayar sin il velo u sin la vestgadira, ed ins è bain visibel.