France Gall festivescha oz ses 70avel anniversari. Ella ha fatg dapi ils onns 50 ina carriera remarchabla plain semperverds. En ina da sias chanzuns las pli enconuschentas chanta ella: «Ella, ella l'a». In titel che na tradescha bler, pero el ha da far cun ina da las grondas vuschs dal jazz:
New York, 1934: En l'«Apollo Theatre» a Harlem datti ina saira da talents. Er ina chantadura da 17 onns sa partecipescha. Il public che ha in'idea da chant e musica sa immediadamain ch'el ha gist vis ed udi ina giuvna enorm talentada cun ina vusch excepziunala, tut autra che las autras. Ina chantadura cun il fieu ed il scharm unic. Uschia ha cumenzà la carriera dad Ella Fitzgerald ch'è daventada ina da las pli renumadas interpretas dal jazz.
Il talent ed il fenomen Ella Fitzgerald han inspirà il cumponist franzos Michel Berger. El ha cumponì ina chanzun cun il titel: «Ella, elle l'a». Cler, i sa tracta da la gronda chantadura, pero Berger evitescha da vegnir memia concret e da tradir il num «Fitzgerald». El descriva pero bain la sensaziun ch'i dat sch'ins auda sia vusch, quel sentiment incumparabel. Apunta: Ella ha quai ch'autras n'han betg.
Er tar la musica resta Berger consequent. I sa tracta d'in toc en il stil dals onns 80, senza influenzas dal jazz. Quella chanzun ha el lura dà a sia dunna France Gall ed ella ha fatg cun quella in semperverd che tuna er ozendi anc adina fitg frestg.
