A l'entschatta dal 1974 ha cumponì Bruce Springsteen ina chanzun che ha gi conseguenzas per sia carriera ed er per la musica da rock. «Born to run» è stà quel toc che ha fatg vegnir enconuschent Springsteen sin tut il mund, l'emprim da blers auters gronds semperverds ch'èn seguits e cun quai è er vegnì popular in gener da musica ch'è vegnì numnà «Album oriented Rock», vul dir in stil da rock cumpact dad in disc che sa lascha programmar bain en ils radios da quel furmat.
La chanzun «Born to run» raquinta sco savent tar Springsteen da la vita quotidiana pauc spectaculara da la glieud tut normala, da lur quitads, starments e speranzas. E savens èn ils temas: libertad, tagliar la corda e superar cunfins, Perquai ha Springsteen er tuc ils sentiments da blers americans, da quels ch'èn betg en il center da l'interess ed en la glisch sin ils palcs. Cun ses terz album da studio cul medem num e surtut cun questa chanzun è Springsteen vegnì catapultà en las sferas las pli autas, e 10 onns pli tard, cun «Born in the USA» é el arriva sin l'olimp dal rock, là nua chel è anc ozendi.
