Il 1956 è cumparì «Roll Over Beethoven» da Chuck Berry. In grond success per il piunier dal rock'n'roll. Blers han pli tard reinterpetà la chanzun.
La versiun la pli interessanta è quella da l'Electric Light Orchestra, la band da Jeff Lynne. El era gia enconuschent sco commember da «Idle Race» e «The Move». Lura ha el furmà sia atgna band cun in num che fa mirveglias: «L'Electric Light Orchestra», ch'è daventà renumà pervi da ses sound progressiv, cun ghitarras electricas, keyboards – ed er violinas e cellos.
Questas caracteristicas sa mussan er en il toc «Roll Over Beethoven», che descriva ils temps, cura ch'il rock'n'roll è daventà popular. Da la versiun simpla e gruglia da Berry han Jeff Lynne e «l'Electric Light Orchestra» fatg in toc pompus cun in intro da la 5avla sinfonia da Beethoven cun ina lunghezza dad otg minutas. Lur represa è daventada la pli famusa, anc meglra che las 50 autras ch'i dat, includì quellas dals Beatles, dals Rolling Stones e da Status Quo.
