Cun 14 ha Mark Knopfler survegnì sia emprima ghitarra. Cun 29 ha el sunà ina chanzun ch'è daventada legendara: «Sultans of swing».
L'emprim era la musica per el be ina buna via per finanziar ses studi da schurnalissem. Ils raps eran stgars, però per ina visita en il pub bastavan els. Là suna ina saira ina band da jazz plitost mediocra cun in num impressiunant: Ils «Sultans of Swing» ed el han l'idea per ina chanzun. Cun sia band «Dire Straits» – in num che descriva ina situaziun finanziala pauc agreabla – fa el ina registraziun e quella vegn per cas tar in moderatur da radio, che preschenta il toc en sia emissiun. Il rest è istorgia.
«Sultans of Swing» è er il num da l'emprim disc dals Dire Straits e lur emprim grond hit. Ina da las raschuns è segiramain er il stil da sunar ghitarra da Mark Knopfler. Cun sia Fender Stratocaster 1961 creescha el in sound unic, insatge dal tuttafatg nov, cler e transparent e cun gronda virtuositad. Quai mussa el surtut cun ses solo tar «Sultans of Swing» ed er pli tard tar numerus auters hits dals Dire Straits e sco giast tar registraziuns da Tina Turner, Bob Dylan e Sting.
